Беларусы зноўку актыўна закупаюць замежную валюту. Гэта паказваюць дадзеныя статыстыкі Нацбанка Беларусі за чэрвень. Ці выкліканая гэтая тэндэнцыя чаканнямі чарговага абясцэньвання нацыянальнай валюты?

У параўнанні з траўнем насельніцтва набыла на 17,4 млн долараў болей, чым прадала. Такіх паказчыкаў не было з сакавіка мінулага году. Шэраг эканамістаў лічаць гэта заканамерным для летняга сезону.

— Людзі едуць у адпачынак. Таму аб пагаршэнні статысткі пакупкі замежнай валюты можна будзе меркаваць па паказчыках жніўня, калі час адпачынкаў падыйдзе да канца , — кажа фінансіст Антон Болтачка.

За першае паўгоддзе рост грашовай масы ўжо дасягнуў запланаванага на год — 20 %. Праўда, ён кампенсуецца ростам коштаў на спажывецкія тавары. Таму, на думку былога старшыні Нацбанка Станіслава Багданкевіча, у бліжэйшыя месяцы курс замежнай валюты не будзе рэзка змяняцца:

— Інфляцыя часткова стрымлівае рост коштаў на валютным рынку. Улічваючы, што ў нас станоўчае сальда гандлёвага балансу, у бліжэйшыя месяцы не варта чакаць праблем з валютным рынкам.

Звярнуць увагу ў першую чаргу на павелічэнне наяўных грошаў у абароце рэкамендуе і эканаміст Сяргей Чалы:

— Пасля падзення даходаў насельніцтва ў выніку крызісу ўлады падвышалі заробкі да пэўнай мяжы. Аднак калі працягваць гэтую палітыку падвышэння заробкаў далей, відавочна, што мы атрымаем неабгрунтаванае падвышэнне даходаў, што небяспечна.

Эканаміст адзначае, што перавод рублёў у наяўную і безнаяўную замежную валюту, а таксама рост спажывання ў выніку росту даходу можа паўплываць на валютны рынак і выклікаць нестабільнасць нацыянальнай валюты.

У той жа час мы знаходзімся каля мяжы , калі насельніцтву ўжо невыгодна захоўваць грошы на дэпазітах у беларускіх рублях.

— Напачатку года захоўваць грошы ў беларускіх рублях у банку было вельмі выгодна. Цяпер жа, калі стаўка рэфінансавання зніжаецца, трымаць назапашанае ў беларускіх рублях — эканамічна недальнабачныя паводзіны , — адзначае Леанід Заіка і рэкамендуе захоўваць грошы ў амерыканскіх далярах ці кітайскіх юанях.

Такім чынам, вызначальным стане апошні месяц лета, тады можна будзе меркаваць пра ўстойлівасць і абгрунтаванасць попыту на замежную валюту.

+ Белорусские вкладчики не доверяют госбанкам и рублю

+ Куда белорусу выгоднее и надежнее вложить свои сбережения?